AGAPI é a Asociación Galega de Produtoras Independentes. Foi constituída o 19 de decembro de 1994, contando inicialmente con tan só 7 asociados na firma dos seus estatutos. En pouco tempo uníronse practicamente tódalas empresas relevantes de produción audiovisual e multimedia de Galicia, contando na actualidade con 35 socios.

Isto convértenos no interlocutor válido e representativo co que contan as produtoras independentes galegas. Como tal, durante os últimos anos desempeñamos un papel fundamental fronte ás institucións, sendo unha das pezas clave no despegue do audiovisual galego. Hoxe se nos considera un sector empresarial en alza na nosa comunidade, considerado estratéxico polo goberno autónomo galego. AGAPI é tamén membro de FAPAE (a Federación de Asociacións de Produción de España) e mantén un estreito contacto con EGEDA (a Entidade de Xestión de Dereitos Audiovisuais dos produtores españois), ademais de participar en diversos foros e mercados internacionais do sector. O dinamismo da asociación e dos diferentes membros de AGAPI maniféstase así na nosa apertura ó exterior, buscando e establecendo colaboracións con empresas e entidades tanto en España como no mercado internacional.