O futuro da animación dixital e dos videoxogos

2009-07-20

Sete premios Goya conseguiu xa o sector da animación galega, cinco para Bren Entertainment e dous para Dygra Films. A mesa sobre animación dixital e videoxogos das xornadas NovoMed 09 analizou a súa evolución a través da experiencia dos mellores profesionais galegos e internacionais.

Nieves Rodríguez Brisaboa, xestora do Programa Sociedade da Información do PGIDIT (Plan Galego de Investigación, Desenvolvemento e Innovación) moderou o debate entre:

- Carlos Fernández, director Continental Games

- Alberto Neira, director de Produción de Bren Entertainment

- Beatriz Legerén, directora Iinteracción CIM

- Enrique Criado, director Enxebre Entertainment

- Vincent Sourdeau, director Cartoon Network España

- Daniel Parente, director xeral Revistronic

A cifra de premios pon de relevancia o rápido desenvolvemento que conseguiu o sector en Galicia e, sobre todo, a súa alta calidade. O sector dos videoxogos seguiu este camiño de crecemento, conseguindo rapidamente o favor do público e perfilándose como “a segunda opción máis importante de ocio despois da televisión”, segundo apuntou Beatriz Legerén.

Este crecemento verase impulsado pola recente consideración da industria do videoxogo “como unha industria cultural”, destacou Beatriz Legerén, directora de Interacción CIM. Esta modificación sae na nova Lei de Propiedade Intelectual que tamén regula o canon dixital.

O fomento das compañías nacionais é outra das reclamacións do sector que quere “evitar a fuga de talentos e fomentar o mercado nacional”. O sector, para ela, tamén está moi necesitado dun forte apoio á distribución e a promoción na primeira fase de negocio, tanto polas características do mercado como por problemas intrínsecos do sector, como a incompatibilidade de formatos.

A directora de Interacción CIM realizou na súa charla un repaso completo a historia do videoxogo dende os seus inicios na década dos oitenta ata os xogos actuais para as consolas de última xeración.

Despois desta introdución, Carlos Fernández, de Continental Games, centrouse na industria galega onde a evolución dos videoxogos estivo marcada por tres obras Play Center, de Estudio Underground; O templo, de Interacción; e E.L.E., de Continental Producciones e Alia 3D. Para el, a grande vantaxe que pode esgrimir Galicia en canto a produción de videoxogos son os laboratorios das universidades, a experiencia do sector da animación e a capacidade das produtoras audiovisuais.

No caso específico de Alia 3D e Continental Games, acaban de conseguir unha licenza de desenvolvemento de xogos para a multinacional nipona Nintendo, o que lles permite “finalizar un produto e colocalo en dous meses nas tendas de Europa e Oceanía; o que é un salto xigantesco”. Con vistas ao seu crecemento de futuro as dúas compañías están a traballar na construción dun consorcio con produtoras, laboratorios das Universidades de Vigo e Santiago e a plataforma tecnolóxica I+dea.

Dende o sector da animación dixital, Alberto Neira, director de produción de Bren Entertainment, analizou a evolución dos proxectos da súa compañía. Despois da caída de ingresos pola redución do mercado do DVD e a baixada da venda de dereitos de emisión, Bren Entertainment reduciu o presuposto medio dos seus títulos e apostou polas películas que combinan imaxe real e animación dixital.

“Pérez, o ratiño dos teus soños” foi un exemplo desta mestura que, ademais, conseguiu o respaldo do público internacional, en especial, de Arxentina, país co que se coproduciu. Actualmente, o estudio de animación de Santiago de Compostela está a traballar na película “Copito de Nieve”, cunha estrea prevista para o ano 2010. Alberto Neira aventurouse a adiantar o futuro da animación que pasará por “presupostos mesurados, de 5 a 6 millóns de euros, vendas internacionais, e proxectos que combinan a imaxe real e as tres dimensións”. Para un futuro máis lonxano tamén as obras de Bren pasarán pola técnica da estereoscopía.

Enrique Criado, director de Enxebre Entertainment, é, precisamente, un dos mellores especialistas en estereoscopía do mundo. Na súa charla botou a vista atrás e explicou os avances nesta técnica dende os primeiros experimentos na década dos cincuenta ata o seu éxito actual entre os grandes estudios. “Dende o ano 2004, cando Disney estreou a película “Polar Express” en cines IMAX e en cines dixitais, demostrouse que funcionaba moito mellor nestes últimos”.

A estereoscopía está a conseguir traer de novo o público ás salas de cine e elevar moito a rendibilidade dos cines en 3D. En Galicia acaba de abrir as súas portas a primeira sala DCI 3D nos cines Filmax de A Coruña, que foi rapidamente seguida por outras salas en Vigo e Lugo. Enrique Criado apunta dúas tendencias de evolución: as tres dimensións chegarán aos nosos fogares e aos videoxogos. Aínda queda dominar a aplicación da técnica á narratividade “grazas ao 3D podes intensificar as emocións dunha película, aínda temos que aprender a psicoloxía da percepción e como afectan estas novas técnicas á película”.

No sector do videoxogo traballa Daniel Parente, director xeral de Revistronic, unha recoñecida compañía que despuntou a partir de 2004, cando conseguiron o investimento dunha compañía de capital risco. Dende a súa empresa desenvolven videoxogos para Warner e, tamén, plataformas on line. A converxencia entre videoxogos e cine é unha realidade para esta compañía que desenvolve xogos para producións estadounidenses e sabe que o futuro pasa pola integración dos contidos xerados polo usuario.

Cartoon Network é unha das canles temáticas de debuxos animados que emiten no ámbito internacional. Vincent Sourdeau é o seu director para España, onde o negocio da compañía nace do gran catálogo de series de debuxos clásicas e polos seus propios títulos. Cartoon crea cada ano capítulos de series como “As supernenas” ata acadar cifras de produción de entre 200 e 250 capítulos cada ano. No seu caso, a compañía produce as series e vende as licencias a desenvolvedores para a produción dos videoxogos.

Para finalizar a mesa, despois da participación dos profesionais, Nieves Rodríguez Brisaboa, xestora do programa Sociedade da Información do Plan Galego de Investigación, Desenvolvemento e Innovación Tecnolóxica, resumiu a colaboración da Administración no estímulo da investigación e innovación empresarial a través das cifras xa que “dende o 2006 as subvencións ascenden a 4 millóns de euros e, no caso de das axudas á innovación empresarial, ascenden a 1.300.000 euros”.